Peanut Tips : குளிர்காலத்தில் வேர்க்கடலை சாப்பிடும் முன் தெரிந்துகொள்ள வேண்டிய 6 Golden Rules!

குளிர்காலம் தொடங்கியவுடன் சூடான சிற்றுண்டிகள் மீது ஆசை அதிகரிப்பது இயல்பான ஒன்றாக மாறிவிடுகிறது. அந்த வரிசையில் பெரும்பாலானோர் முதலில் தேர்வு செய்வது வேர்க்கடலையே. மலிவு விலையில் கிடைக்கும் இந்த சிற்றுண்டி, சுவையுடன் சேர்ந்து பல ஊட்டச்சத்துகளையும் வழங்குகிறது. ஆனால் அதே நேரத்தில், சரியான அளவு மற்றும் முறையை கடைபிடிக்காமல் வேர்க்கடலை சாப்பிட்டால், அது உடலுக்கு நன்மை தருவதற்குப் பதிலாக எடை அதிகரிப்பு உள்ளிட்ட பிரச்சனைகளுக்கு காரணமாகவும் மாறக்கூடும் என்று நிபுணர்கள் எச்சரிக்கின்றனர்.

வேர்க்கடலையில் புரதம், நல்ல கொழுப்புகள், நார்ச்சத்து மற்றும் ஆற்றல் அதிகமாக உள்ளது. இதனால் உடலுக்கு உடனடி சக்தி கிடைக்கிறது. ஆனால் கலோரிகள் அதிகம் உள்ளதால், அளவுக்கு அதிகமாக சாப்பிடும் பழக்கம் இருந்தால் அது உடலில் தேவையற்ற கொழுப்பு சேர்க்கப்படுவதற்குக் காரணமாகிறது. இதனால் தினமும் ஒரு கைப்பிடி அளவு, சுமார் 28 கிராம் வரை மட்டும் வேர்க்கடலை சாப்பிடுவது சிறந்தது என்று ஊட்டச்சத்து நிபுணர்கள் பரிந்துரைக்கிறார்கள்.

மேலும், உப்பு சேர்க்கப்பட்ட வேர்க்கடலையை விட, உப்பில்லாத அல்லது குறைந்த உப்பு கொண்ட வேர்க்கடலையை தேர்வு செய்வது உடலுக்கு பாதுகாப்பானது. அதிக சோடியம் உடலில் இரத்த அழுத்தம் மற்றும் இதய பிரச்சனைகளை உருவாக்கும் அபாயம் கொண்டதால், உப்பில்லாத வகைகள் ஆரோக்கியமான தேர்வாக கருதப்படுகின்றன. வேர்க்கடலையை தனியாக சாப்பிடுவதற்கு பதிலாக, பழங்கள் மற்றும் காய்கறிகளுடன் சேர்த்து எடுத்துக்கொண்டால், உடலுக்கு தேவையான கூடுதல் ஊட்டச்சத்துக்கள் கிடைக்கும்.

அதே நேரத்தில், இனிப்பு வகை சிற்றுண்டிகள் அல்லது சர்க்கரை அதிகம் உள்ள உலர் பழங்களுடன் வேர்க்கடலையை சேர்த்து சாப்பிடுவது தவிர்க்கப்பட வேண்டும். இது கலோரி அளவை மேலும் அதிகரித்து, எடை அதிகரிப்புக்கு வழிவகுக்கும். வேர்க்கடலை சாப்பிடும் பழக்கம் உள்ளவர்கள் தினசரி உடற்பயிற்சியையும் வாழ்க்கை முறையின் ஒரு பகுதியாக மாற்றிக் கொண்டால், உடல் எடை கட்டுப்பாட்டில் இருக்கும்.

முக்கியமாக, சிலருக்கு வேர்க்கடலை ஒவ்வாமை ஏற்பட வாய்ப்பு உள்ளது. தோலில் அரிப்பு, மூச்சுத்திணறல் அல்லது வயிற்று பிரச்சனைகள் போன்ற அறிகுறிகள் இருந்தால், வேர்க்கடலை சாப்பிடுவதை தவிர்ப்பது அவசியம். மொத்தத்தில், சரியான அளவு, சரியான முறையில் சாப்பிட்டால் வேர்க்கடலை குளிர்காலத்தில் ஒரு சிறந்த ஆரோக்கிய சிற்றுண்டியாக அமையும் என்பதே நிபுணர்களின் கருத்து.